—مشاهدة
أنواع الـ Issues في Jira
الدرس الثالث: أنواع الـ Issues على Jira والفرق العملي بين Story و Task و Bug و Subtask، إيمتى تستخدم كل نوع، وكيف تضيفهم وتربطهم ببعض.
قبل ما تبدأ
- يكون عندك مشروع جاهز من الدرس الثاني
- فكرة عن الـ Backlog والـ Board من الدرس الأول
الخلاصة بنقاط
- Epic هدف كبير بيجمّع تحته Issues، والـ Subtask تقسيم داخلي لـ Issue واحد
- الـ Story بتوصف قيمة للمستخدم، والـ Task شغل لازم ينعمل بس ما بيوصف قيمة مباشرة
- الـ Bug انحراف عن السلوك المتوقّع — لازم خطوات إعادة إنتاج + نتيجة فعلية + نتيجة متوقّعة
- أنواع الـ Issues مش ثابتة: بتقدر تضيف أو تعدّل الأنواع من إعدادات المشروع
- النوع الغلط بيطلع أرقام غلط بالتقارير والفلاتر — اختيار النوع مش تفصيل شكلي
هرم الأنواع
Epic فوق، تحته Story و Task و Bug، وتحتهم Subtask. الـ Epic بيجمّع شغل تحت هدف واحد، والـ Subtask بتقسّم شغلة وحدة لخطوات.
Story مقابل Task
Story: بتوصف نتيجة للمستخدم — «كمستخدم، بدي أفلتر النتائج عشان ألاقي أسرع».
Task: شغل لازم ينعمل بس ما إله واجهة ولا قيمة مباشرة — إعداد بيئة، ترحيل بيانات، توثيق.
الـ Bug
انحراف عن السلوك المتوقّع. الحد الأدنى لأي bug: خطوات إعادة الإنتاج، النتيجة الفعلية، والنتيجة المتوقّعة.
ليش النوع مهم؟
التقارير والفلاتر واللوحات كلها بتتبنى على النوع. نوع غلط يعني تقارير بتحكي شي والواقع شي ثاني.
بالدرس الجاي: تقسيم الـ Backlog وتشغيل أول Sprint.
تمرين
رتّب الـ Backlog بأنواع صحيحة
- أنشئ Epic واحد يمثّل ميزة كبيرة بمشروعك
- أضف تحته 3 Stories بصيغة: كمستخدم، بدي ... عشان ...
- أضف Task واحد لشغل ما إله واجهة — مثلاً تجهيز بيئة اختبار
- سجّل Bug فيه خطوات إعادة إنتاج ونتيجة فعلية ونتيجة متوقّعة
- قسّم أطول Story لـ Subtasks
- افتح الـ Backlog وفلتر حسب النوع وشوف الصورة الكاملة
اكشف الحل
- الـ Epic بيظهر بلون مميّز، وبتشوف كل اللي تحته من شاشته أو من الـ Timeline
- إذا ما قدرت تكتبها بصيغة «كمستخدم...» غالباً هي Task مش Story
- الـ Task شغل لازم ينعمل بس ما بيوصل قيمة للمستخدم: إعداد بيئة، ترحيل بيانات، توثيق
- bug بلا خطوات إعادة إنتاج بيرجع لإلك Cannot Reproduce — الخطوات + الفعلي + المتوقّع هي الحد الأدنى
- الـ Subtask بتتبع Issue واحد وما بتنتقل لوحدها بين الـ Sprints
- الفلترة حسب النوع بتكشف اختلال التوزيع: Backlog كله Tasks يعني محدا بيفكّر بقيمة المستخدم
تقدّم الشهادة0%
شاهد 90% من الفيديو حتى ينحسب هذا الدرس مكتمل.
خلصت الدرس؟ 👏خذ استراحة 60 ثانية واصطد bugsلعبة Debug Hunt — بتلعبها عالموبايل كمان
العب هسا 
النقاش 🔻