كيف تضيف Version و Release على Jira
الدرس الخامس: إدارة الإصدارات على Jira — إنشاء Version، ربط الـ Issues فيها بحقل Fix Version، متابعة صفحة Releases، وإطلاع النسخة وشو بيصير للشغل اللي ما خلص.
قبل ما تبدأ
- مشروع فيه Issues و Sprint شغّال من الدروس السابقة
- صلاحية إدارة المشروع (Administer project) عشان تقدر تنشئ Versions
الخلاصة بنقاط
- الـ Version وحدة تجميع للشغل اللي رح يطلع بنسخة واحدة — مش نفس الـ Sprint
- حقل Fix Version على الـ Issue هو اللي بيربطه بالإصدار، وبيتعبّى وقت التخطيط مش بعدين
- صفحة Releases بتوريك لكل Version شو خلص وشو لسا — أسرع تقرير جاهز للفريق والعميل
- لمّا تعمل Release بتنسكّر الـ Version وبينحدّد إلها تاريخ إصدار، والـ Issues غير المكتملة لازم تنقل
- للمختبر: الـ Fix Version هي اللي بتحدّد شو لازم يُختبر بهذه النسخة وشو داخل بالـ regression
Version مقابل Sprint
الـ Sprint وحدة زمنية (فترة شغل)، والـ Version وحدة إصدار (شو رح يطلع للمستخدم). ممكن Version تأخد شغل من عدة Sprints.
حقل Fix Version
هو الربط بين الـ Issue والإصدار. عبّيه وقت التخطيط مش بعد ما تطلع النسخة، وبتقدر تعبّيه لعدة Issues مرة وحدة من الـ Bulk change.
صفحة Releases
من قائمة المشروع بتفتح Releases وبتشوف كل Version: كم Issue خلص، كم لسا، وتاريخ الإصدار المتوقّع — تقرير جاهز بلا مجهود.
إطلاع النسخة (Release)
لمّا تضغط Release، الـ Version بتنسكّر وبينحدّد إلها تاريخ إصدار، ولازم تقرّر وين تروح الـ Issues اللي ما خلصت.
وين بيوقع المختبر؟
الـ Fix Version بتعطيك قائمة الشغل اللي داخل النسخة — وهي أساس خطة الاختبار والـ regression قبل الإصدار.
بالدرس الجاي: إعدادات المشروع وإضافة الأعضاء وتوزيع الصلاحيات.
أطلع أول Release من مشروعك
- افتح Releases من قائمة المشروع وأنشئ Version باسم 1.0
- حدّد تاريخ إصدار متوقّع للـ Version
- افتح 5 Issues واعطيهم Fix Version = 1.0
- أنشئ Version ثانية باسم 1.1 واربط فيها Issue واحد
- افتح صفحة Releases وقارن نسبة الإنجاز بين 1.0 و 1.1
- اعمل Release للـ Version 1.0 وشوف شو صار للـ Issues غير المكتملة
اكشف الحل
- Releases موجودة بقائمة المشروع، وزر Create version فوق الصفحة
- تاريخ الإصدار المتوقّع بيطلع بصفحة Releases وبينبّه إذا الـ Version متأخّرة
- Fix Version حقل على الـ Issue نفسه، وبتقدر تعبّيه لكلهم مرة وحدة بالـ Bulk change
- Version وحدة بتقدر تحتوي Issues من أكثر من Sprint، والـ Sprint الواحد فيه Issues لأكثر من Version
- صفحة Releases بتوريك عدد الـ Issues المكتملة وغير المكتملة لكل Version
- وقت الـ Release، Jira بتسألك شو تعمل بالـ Issues غير المكتملة: تنقلها لـ Version ثانية أو تشيل الـ Fix Version
شاهد 90% من الفيديو حتى ينحسب هذا الدرس مكتمل.
النقاش 🔻